29 maart 2024
Laatste:

Column Joop Hekkelman week 49

30 november 2020

Wel of gin kunst

Al vief jaor kö-w in ons dorp genietn van buutngewoon mooie kunst. Um ‘n museum van disse kwaliteit te bezeukn, daor mosse wiej altied lange reizen veur maakn. Wat ‘n genot wodt ons in More elken keer opniej zo dichte bie huus an ereikt.
Dat ‘t museum lef hef bewiest ze op dit moment met de expostie van de televisieschilder wijlen Bob Ross. Dat wolle wiej zeen. Op de eerste dag nao de corona-sluting ko-w al metene terechte. De kunst wee den man maakn wodt neet deur iederene as kunst ezene, begreep ik uut reacties van meerdere zogenaamde deskundigen. Der bunt gestudeerde lu dee-t daoraover uutgebreid könt klassineern en zien schilderiejen afkraakt, vake met weurde dee-t allene ‘echte kenners’ begriept. Ross zelf neumm zien wark ‘gin secure traditionele kunstvorm’. Hee wis dus zelf heel good dat e afweek van de gangbare norm. ‘t Is daorumme zo mooi dat ‘ons’ museum, met ‘n wereldprimeur nog wel, ons zelf löt bepaoln of wiej ‘t wat vindt.
‘t Is met schilderiejen net as met muziek. Den enen höldt van Frans Bauer, ‘n ander van Boudewijn of klassiek en der bunt lu dee ‘t op Rammstein, Cuby of The Beatles holdt, met alle varianten dee-t daor tussenin zit. Ieder zien meug zo-k denken. Ik hove aover ‘n ander zien veurkeur gin oordeel te velln of te heurn.
En jao, wat is kunst. De gemiddelde kieker hef zien oordeel op basis van ‘t plaatje dat e zut. Hee zit neet te wachten op ingewikkelde verhaaln aover ‘n techniek zus of zo. Zelf vin ik achtergrondverhaaln aover de maker interessanter. De boodschap den Ross zien publiek metgaf laog der ok neet umme: ‘n fout dee-j maakt mo-j gebruukn um wat moois te maakn.
Nog effn dit, veur ‘t geval iej ‘t nog neet hebt begreepm, wiele vonn ‘t biezunder de meuite weerd. ‘t Maakverhaal dat derachter zit maakt ‘t kunstwarkn. Ik zee ‘t miejzelf namelek neet doon.
A-j gelaegenheid hebt mo-j beslist effn gaon kiekn. Dan kö-j zelf oew mening vormm. Dat is deurgaons de beste meniere, want van heurn zeggn kö-j oezelf ‘n hoop onzin wiesmaakn. Dat zol in dit geval, beslist jammer waen.