29 maart 2024
Laatste:

Column Joop Hekkelman: ‘t Gif van de saammlaeving

26 mei 2023

Krantenkop: Boer in Kampen verlös bienao de helfte van zien beeste. Vermoedeleke oorzaak is de grond woor ’n diek met is an-eleg. Um dat zeker te weetn wil den boer onderzuken, of laoten onderzuken, woor de scha precies vandan kump. De man krig in ’n paar artikeln in de krante andach en ’n buurvrouw zamelt geld in um dat onderzuuk te ondersteunn.
De schade is in zo’n geval neet allene van financiële aard. A’j zomaor oew vee verleest dan snidt oe dat letterlek deur ’t hatte. ’t Is veur den man te haopen dat iederene, dus ok de aoverheedn, ruumharteg metwarkt um de oorzaak te vinn.
Ik vreze ’t teegndeel veur dén boer. Dat zeg ik neet zomaor. Ooit wodden ik in mien wark confronteerd met ’n eender geval. ’n Boer woonn naobie ’n stortplaatse. Der kwam ‘n moment dat de beeste gin melk meer gaavm en de zeugen neet meer drachteg wodden. Dén man lek opens zien vak neet meer te verstaon. Zien vee dronk grondwater, dat brach de veedokter op ’t idee um ze an leidingwater te zetten. De beeste knapm dervan op. Onderzuuk nao onderzuuk volgen: de stortplaatse was oorzaak. De betrokken instanties verschaoln zich achter mekare of gooien de verantwoordelekheid van zich af. Ondertussn was den man in financieel an ‘t ende van zien leedje en ging failliet. Hee wodden an zien lot aover-elaotn en kon bastn.
At ‘t in dit land geet umme de negatieve gevolgen van collectieve voorzieningen dan wasse wiej de hande te makkelek in onschuld. De veurbeelden uut recenter tieden hoof ik hier neet te neumm, dee bunt iederene bekend. Goedwilnde präötjes bunt der zat, maor de on-uutgespraoken driefveern um niks te doon bunt angst veur schade an marktandeel en politieke posities.
Veur dén boer in Kampen is te haopen dat de andach veur zien naregheid meer wodt dan de paar krantenberichtjes dee’w töt noe an too ezeen hebt. Vake ebt ’t al gauw weer weg in de media. Der is ’n chronisch gebrek an onderzuuksjournalisten dee-t zich in zo’n zaak vastebiet, an empatische bestuurders dee-t verantwoordelekheid dörft te nemm en an buurvrouwn dee-t gedupeerden laot veuln dat ze der too doot.