29 maart 2024
Laatste:

Column Joop Hekkelman: Integer veur de bühne

25 juli 2022



Kots laaien der ‘n discussie op aover stemgedrag in de Provinciale Staten.
Belanghebbenden; laes boern, kunstmest- en veevoerhandelaarn, dee’t daor ‘n zetel hebt zoln neet meugen stemm at ‘t um provinciaal stikstofbeleid geet. ‘t Schient ‘n soort van gewoonte te waen at zo iemand direct belang hef bie ‘n kwestie den an de orde is. ‘t Is gin veurschrift, maor zogenaamd gebaar van integriteit.
Der is nooit völle publieke andach veur ewes, zoas dat geldt veur de meeste zaakn dee’t zich afspölt in ‘n provinciehuus.

Waorumme noe dan inens wel? Der mot ‘t kommende joor ‘n keer estemd wodden aover de uutvoering van de stikstofplann van ons kabinet. Dat raakt de agrarische sector in ‘t hatte. De kans van slagen is groter a’j alvaste wat weerstand uutschakelt. Um de boel der deur te kriegn kö‘j gin dissidentn gebruukn in aegen gelederen. ‘n Betjen stemming maken en vermeende weerstand alvaste ‘t stempel van onvermogen opdrukkn bliekt opens ‘n antrekkelek middel.

Ik vin ‘t maor ‘n rare gewoonte dat ‘zich onthollen van stemming’ umda’j tovalleg in ‘n bepaolde categorie valt. Al kent belang natuurlek gradaoties. Volksvertegenwoordegers bunt ekaozen um namens de kie:zer, op basis van aegen inzicht de juuste beslissing te nemm. Iej zit daor neet um alles zwiegend an oe veurbiej te laotn gaon.

‘t Bunt neet allene boern dee’t stikstof zwaor op de mage ligt, börgers bunt solidair. Een zogenaamd belanghebbend statenlid den de ongeschreven gewoonte effen löt veur wat ‘t is en toch stemt, in bepaolde gevalln ‘teegndraods’, dreg zodoonde al gauw bie an evenredege vertegenwoordeging.

Iederene dee ‘n verkaozn politicus disse integriteitsvraoge stelt, mot zichzelf ‘s ‘n spegel veurholln en zich afvraogen hoo verkiezingsliesten töt stand komt en hoo vake der tegen ‘t persoonleke gevuul wodt estemd in ‘t belang van fractie of coalitie? Stemvee! Hoo eerlek bu’j dan ewes?

Oe laoten uutsluutn of metbugen; in beide gevalln do’j oezelf geweld an. Dit soort discussies aover volksvertegenwoordigers bunt veur de bühne. Do wat ‘t hatte ingif, en bedenk oe; zoas Drs. P. ooit schreef: ‘t geet allene maor um ‘n niej begin en ‘t verlöp nooit aldus.


Joop Hekkelman